https://nashaniva.com/408221

Шмат гадоў футбольную «Іслач» на матчах падтрымліваў «люты баяніст». Куды ён дзеўся цяпер?
Некалькі сезонаў запар на матчах «Іслачы» з Мінскага раёна — як хатніх, так і выязных — запальваў баяніст: заўзятар каманды прыходзіў на трыбуны з інструментам. У 2020 годзе ён перастаў быць лакальным мемам і набыў у пэўным сэнсе міжнародную вядомасць. Праз кавід у Еўропе футбол апынуўся на паўзе, а ў Беларусі працягвалі гуляць — за дзіўным турнірам сачылі ў розных кутках свету. Пра баяніста пачалі рабіць сюжэты розныя медыя. Аднак з сезона-2024 пра яго няма згадак у клубных аглядах — быццам чалавек знік. Праект Betting.team паспрабаваў ( https://betting.team/football/blogs/12090-kuda-propal-lyutyj-bayanist-valera-zvezda-matchej-islo/ ) высветліць, як змянілася жыццё музыкі з таго часу.

Адкуль ён такі ўзяўся?

Баяніста завуць Валер Калантай. Пра сябе ён расказаў у 2019 годзе клубнай прэс-службе. Нарадзіўся ў Заслаўі, але пераехаў у Міханавічы Мінскага раёна, дзе знайшоў жонку. 20 гадоў адпрацаваў у мясцовай школе выкладчыкам гісторыі, працы і музыкі. Сярод яго вучняў былі будучы галоўны трэнер «Іслачы» Віталь Жукоўскі, а таксама будучы гулец Ігар Зюлеў.

Яшчэ Калантай падпрацоўваў тамадой. Пайшоўшы са школы, ён стаў прыватным прадпрымальнікам — арганізаваў музычны міні-калектыў «Гармоніка» (аснову рэпертуару складалі народныя песні і песні расійскіх выканаўцаў, а таксама хіты 1980-х), выступаў у санаторыях, а таксама ў розных вёсках і пасёлках. Акрамя таго, Калантай быў удзельнікам гурта White Russians, які гастраляваў па Германіі, «граў у знаёмых немцаў, прасоўваў беларускую і рускую музыку ў Еўропу».

Заўзятарам «Іслачы» ён стаў яшчэ ў 2016 годзе пасля таго, як даведаўся пра клуб з навін. Пазней адправіў сына ў ДЮСШ «Іслачы» — той займаўся разам з сынам Жукоўскага.

Спачатку Калантай хадзіў на матчы без баяна. Бывала, што на выездах наогул аказваўся адзіным заўзятарам «Іслачы». Інструмент упершыню прынёс у сезоне-2018, каб дадаць разынку ў падтрымку «ваўкоў» і зрабіць тое, чаго раней не рабілі. З цягам часу баяніст стаў візітоўкай клуба з Мінскага раёна.

Слава да фаната прыйшла ў 2020 годзе, калі ва ўсім свеце пісалі пра Беларусь, якая амаль адзіная ў свеце тады не спыніла футбольны чэмпіянат, нягледзячы на пагрозу кавіду. У Расіі яго называлі «героем дня». На адной з пляцовак выйшаў рэпартаж пад назвай «Люты баяніст Валера».

Баян на матчах «Іслачы» можна было пачуць яшчэ ў сезоне-2024. Але потым інструмент знік з публічнай прасторы, як і сам Калантай. Дык што ж адбылося?

На матчах бывае рэдка з-за працы за мяжой

У футбольных колах Беларусі хадзілі размовы, што Калантай перабраўся ў Германію, куды раней ездзіў з гастролямі. Аднак, як удалося даведацца Betting.team, цяперашняе жыццё беларуса не звязанае з Еўропай, хоць значную частку часу ён сапраўды праводзіць за мяжой.

Цяпер Калантай вельмі часта ездзіць у Маскву. Здараецца, што адсутнічае ў Беларусі тыднямі. Ён працуе на вяселлях, юбілеях і іншых урачыстасцях вядучым, грае і на баяне. Замоў вельмі шмат, таму вырвацца дадому няпроста. У такім рытме правінцыйны шоумэн жыве ўжо каля двух гадоў.

Тым не менш, пры магчымасці Калантай імкнецца бываць на матчах «Іслачы». У гэтым сезоне наведаў пяць хатніх гульняў, прычым заўсёды з баянам. Быў ён і 28 кастрычніка на надзвычай важнай сустрэчы з віцебскім «МЛ», у якой каманда з Мінскага раёна перамагла дзейнага чэмпіёна і істотна павялічыла свае шанцы ў чэмпіёнскай гонцы. Святкаванне гола Адэолы Алалее — адзінага ў той дзень на САК «Алімпійскі» — прайшло пад гукі інструмента.

https://nashaniva.com/408202

Беларуская чыгунка паказала новыя пасажырскія вагоны ў фірмовым стылі
У купэйных вагонах і вагонах СВ ніжнія лавы лёгка трансфармуюцца ў сядзенні.

У пятніцу са станцыі Мінск-Пасажырскі ў першы рэйс адправіўся фірмовы цягнік № 2 Мінск — Масква «Беларусь». Ён незвычайны тым, што складаецца з новых вагонаў, паведамляе ( https://www.rw.by/corporate/press_center/news_of_passengers/2026/10/novyy-uroven-komforta-sovremennye-tekhnologii-bjd-prodolzhaet-obnovlenie-261030/ ) прэс-служба БЧ.

У склад цягніка ўваходзяць сучасныя вагоны класаў СВ, купэ і плацкарт. Кожны з іх спалучае ў сабе тэхналагічнасць і зручнасць для пасажыраў.

У купэйных вагонах і вагонах СВ ніжнія лавы лёгка трансфармуюцца ў сядзенні, што дазваляе пасажырам выбіраць найбольш зручны варыянт адпачынку ў дарозе. Таксама прадугледжаны індывідуальныя сейфы.

Штабныя вагоны спецыяльна абсталяваныя для перавозкі людзей з абмежаванымі фізічнымі магчымасцямі, а таксама тых, хто іх суправаджае.

Экалагічна чыстыя туалетныя комплексы, сістэмы абеззаражвання вады і паветра, а таксама кандыцыянавання ствараюць у вагонах здаровае і камфортнае асяроддзе. Акрамя таго, ва ўсіх вагонах ёсць санітарныя вузлы з душавымі кабінамі.

Аўтаматычныя дзверы, герметызаваныя міжвагонныя пераходы, прадуманая сістэма асвятлення і іншыя тэхнічныя рашэнні робяць карыстанне вагонамі зразумелым і зручным.

Не забыліся і пра штодзённыя патрэбы падарожнікаў. У вагонах прадугледжаныя індывідуальныя разеткі для зарадкі асабістых прылад. Цяпер можна не хвалявацца, што ў дарозе разрадзіцца тэлефон або ноўтбук.

Афармленне інтэр'ераў распрацавана і выраблена сумесна з прадпрыемствамі канцэрна «Беллегпрам». У дызайне покрываў і трымальнікаў для штор выкарыстаная стужка з выявай васількоў. Васількі сталі таксама матывам для вышыўкі на ільняных падгалоўніках і сурвэтках.

Элементы фірмовага афармлення нанесеныя на ручнікі і посуд, вырабленыя на прадпрыемствах Беларусі.

У 2026 годзе Беларуская чыгунка атрымала 30 новых пасажырскіх вагонаў. Яны будуць курсаваць у складзе фірмовага цягніка № 2/1 Мінск — Масква «Беларусь».