ОХУ-ын Парламентын гишүүд олонхын саналаар Дмитрий Медведевийг Ерөнхий сайдын албан тушаалд хэвээр үлдээлээ. Түүнийг дөрөв дэх удаагаа Ерөнхийлөгчөөр сонгогдсон Владимир Путин Ерөнхий сайдад нэр дэвшүүлээд байсан юм. Дмитрий Медведев нь 2008-2012 онд ОХУ-ын Ерөнхийлөгч байсан бөгөөд үүний дараа сүүлийн зургаан жил Ерөнхий сайдаар ажиллаж ирсэн юм. ОХУ-ын Ерөнхий сайд Дмитрий Медведев “Санал өгсөн эрхэм хүндэт гишүүд ээ, надад итгэл хүлээлгэж байгаад, миний бие Засгийн газрын тэргүүний үүрэг гүйцэтгэх саналыг дэмжсэнд чин сэтгэлээсээ талархал илэрхийлж байгааг минь хүлээн авна уу. Засгийн газарт цаашид ямар сорилтуудтай тулгарах, ямар үүрэг хариуцлага ногдож байгаа талаар гол анхаарлаа хандуулж байгаагаа хэлсэн. Бид Ерөнхийлөгчийн хөндөж байгаа асуудлуудыг бүгдийг нь шийдвэрлэж чадна гэдэгт итгэлтэй байна” гэж мэдэгдлээ.
Ерөнхийлөгчийн тангаргаа өргөөд удаагүй байгаа Владимир Путин иргэддээ эдийн засаг, технологийн дэвшлийг амлаж байна. Тэрбээр иргэдийнхээ амьжиргааны түвшнийг дээшлүүлэхэд гол анхаарлаа хандуулна гэдгээ онцолж байгаа юм.

Олон Улсын Валютын Сангийн тооцоолсноор ОХУ-ын эдийн засаг сүүлийн таван жилд 24 хувиар буурч, 1.5 их наяд ам.доллараар хэмжигдэж байна. Дотоодын нийт бүтээгдэхүүний үзүүлэлтээр олон улсад есөөс 12 дугаар байр руу ухарсан, харин нэг хүнд ногдох дотоодын нийт бүтээгдэхүүний хэмжээгээр 48-аас 53 дугаар байр руу ахижээ. Түүнчлэн улсын төсөв нь жил бүр алдагдалтай байж ирсэн юм. Хэдий тийм боловч эдийн засгийн нөхцөл сайжирна гэдгийг тус улсын эрх баригчид амлаж байна.

http://bloombergtv.mn/дмитрий-медведев-оху-ын-засгийн-газрын-тэргүүнээр-дахин-сонгогдов/